Jou woorde kan soos dolksteke wees.
Aanhalings uit Joyce Meyer se boek: "Deurdrenk My Met Liefde."
Spreuke 12:18 Praat sonder om te dink, kan soos dolksteke wees; wyse mense bring genesing met wat hulle sê.
Hoekom praat ons so onnodig, so verskriklik baie?
Ons eie ou Langenhoven het eenmaal gesê: “As dit wat jy nou gaan kwytraak nie beter as stilte is nie, bly dan in hemelsnaam net stil.”
Wat is dit wat ‘n mens aanspoor om net te praat en te praat en te praat.
Pasop vir daardie onbesonne woorde wat ons so maklik uitspreek.
Dit kan ‘n geweldige uitwerking hê. Onwetend kan ons mense verwond tot in hulle siele, tot in hulle innerlike wese, hul denke, wil en emosies.
Maar gelukkig is daar die Woord. Luister:
Jesaja 61:1 Die Gees van die Here HERE is op My, omdat die HERE My gesalf het om ‘n blye boodskap te bring aan die ootmoediges; Hy het My gestuur om te verbind die gebrokenes van hart, om vir die gevangenes ‘n vrylating uit te roep en vir die geboeides opening van die gevangenis;
Nou is dit mos so in die lewe dat wanneer mense met diep dolksteke van woorde gewond word, neem dit ‘n lang tyd voordat so iemand weer hy/sy se verkeerde selfbeeld te oorkom.
Nou vra ek myself af; hoekom is dit so verskriklik maklik om mense met ons woorde bitter seer te maak, maar aan die anderkant is dit eenvoudig so moeilik om jou woorde te gebruik om ander te seën?
Kry ons dalk lekker om iemand te sien “suffer” as ons die dolke so diep in hy/haar hart te druk. Ek kry baiemaal daardie idee. En hiervoor het ons ook ‘n duidelike Woord.
Efesiërs 4:29 Laat daar geen vuil woord uit julle mond uitgaan nie, maar net ‘n woord wat goed is vir die nodige stigting, sodat dit genade kan gee aan die wat dit hoor.
Hoe waar is hierdie woorde juis vir ons eie kinders. Ek sien hoe pragtig kinders is wat die regte woorde op die regte tyd ontvang het.
Mooi pragtige mensies wat ‘n trots en ‘n plesier is ook vir ander mense, maar dan kry jy mos daardie wat verkeerde leiding en woorde ontvang het wat net eenvoudig “horrible” is vir die samelewing.
Pasop om vir ‘n kind te sê hy/sy is dom. Daardie saad wat ons vandag plant, begin later groei en dan op ‘n dag ruk hy ‘n Samurai swaard uit soos onlangs in Krugersdorp gebeur het. Dolksteke, kwetsende woorde kan die oorsprong wees. So wees versigtig. Onthou ook die Bybelse beginsel:
Galasiërs 6:7-8 Moenie julleself bedrieg nie. God laat nie toe dat iemand met Hom spot nie. Dit wat jy plant, sal jy ook oes. As jy jou lewe gaan inplant op die terrein van die sonde, sal jy die hel as oes ontvang. Aan die ander kant, as jy jou lewe inplant op die terrein van die heilige Gees, sal jy die ewige lewe as oes ontvang.
Onthou woorde is saad wat ons saai en of ons dit wil weet of nie, dit lewer ‘n oes op. Waar dink ons kom goeie en slegte verhoudings vandaan? Daardie SADE, daardie woorde wat ons links en regs uitspoeg. Ek het al geleer om my nie meer aan mense se woorde te steur nie, maar nou gaan mense se woorde van seën ook ongelukkig by my verby.
Hoekom wil baie kinders as hulle eers uit die huis is nooit weer terugkom nie. Het dit nie met foutvindery, geneul/gekerm, verkleinering van die kinderjare te doen nie. Baie mooi woorde om vir kinders te gee is om vir hulle te vertel dat jy as ouer in hulle glo.
Moet asseblief nooit teregwysing en geloof in jou kinders met mekaar verwar nie. Elke kind het teregwysing nodig wanneer hulle dit verdien, maar netso het hulle ook nodig dat ons in hulle moet glo, in hulle vermoëns glo en dit vir hulle vertel.
Kom ons neem dit van onsself af. Ons het so ‘n behoefte daarin dat mense in ons glo.
Onthou, wanneer ons in mense glo, sal hulle wat wil gee om ons vertroue in hulle te probeer regverdig. Mense probeer harder werk wanneer ons in hulle glo.
Hoe dikwels kry ons dit dat mense bang is vir ons, vir die lewe, vir mislukking? Probeer net diesulkes wysmaak dat ons in hulle glo dan sal ons die verskil in “attitude” sien.
Hier is ‘n klompie woorde. Vat dit van onsself af. Hoe laat dit ons voel? Woorde soos; lelik, dom, mislukking, lomp, hopeloos, onbevoeg, stadig. Dis aaklige woorde.
Moet dit nooit vir mense sê wat u lief het nie, veral nie vir ons kinders nie.
Nou kom ons dink aan woorde soos; aantreklik, talentvol, gesalf, geseënd, skeppend, hoopvol, intelligent. Ons is oortuig dat hierdie woorde ‘n meer positiewe uitwerking op ons het. Dit laat ons baie goed voel, nie waar nie?
Kom ons kyk na ‘n klompie verse in die Bybel wat die mag van woorde illustreer.
Spreuke 15:23 ‘n Man het blydskap in die regte antwoord van sy mond, en hoe goed is ‘n woord op sy tyd!
Spreuke 16:24 Vriendelike woorde is soos ‘n heuningkoek: soet vir die siel en ‘n genesing vir die gebeente.
Spreuke 18:21 Dood en lewe is in die mag van die tong; en elkeen wat dit graag gebruik, sal die vrug daarvan eet.
Nou sien ons mos self hoe uiters belangrik dit vir ons is wanneer ons met liefde teenoor ander wil leef. Dus; maak ‘n gewoonte daarvan om lief te wees vir ander. Waarom dink u sê die Woord:
Hebreërs 10:24 en laat ons op mekaar ag gee om tot liefde en goeie werke aan te spoor;
Dit is absoluut so waar. Wanneer ons in die gewoonte wil kom om lief te wees vir ander, moet ons ‘n wag voor ons mond sit, ons woorde tel sodat ons met ons woorde liefde aan ander kan betoon. Jou woorde stig mense of dit breek mense. Dit is die kort en die lank van die storie.
Hoekom dwing ons sondige natuur ons so om kwaad te praat van ander of ander sommer tromp-op te loop en uit te vreet, sleg te sê sodat die seewater hulle nie kan afwas nie?
Hoekom? Ek weet nie, maar daar is mense wat die een of ander genot “kick” daaruit put.
Romeine 12:21 Laat jou nie deur die kwaad oorwin nie, maar oorwin die kwaad deur die goeie.
Wat is makliker as om iets verkeerds by iemand te sien. “A piece of cake.” Maar onthou dat die liefde ‘n menigte sondes bedek. Liefde ontbloot nie foute nie; dit bedek hulle.
1Pe 4:8 Maar bo alles moet julle mekaar vurig liefhê, want die liefde sal ‘n menigte sondes bedek.
Onthou dit: ELKE WOORD WAT ONS SÊ, KAN ‘N STEEN WEES OM MEE TE BOU OF ‘N BULLDOZER OM ALLES TE VERNIETIG, OM TE STOOT.
Matteus 12:36 Maar Ek sê vir julle dat van elke ydele woord wat die mense praat, daarvan moet hulle rekenskap gee in die oordeelsdag.